ସମିତି ବୈଠକରୁ ସାମ୍ବାଦିକଙ୍କୁ ବ୍ଲକ ଅଧ୍ୟକ୍ଷା ତଡ଼ିଦେବା ଘଟଣା
ତୃତୀୟ ଦିନ ଧାରଣାରେ ଶତାଧିକ ସାମ୍ବାଦିକ
ଶାନ୍ତିସ୍ତୁପ ବ୍ୟୁରୋ: ବାଲିଅନ୍ତା ବ୍ଲକରେ ପଞ୍ଚାୟତ ସମିତି ବୈଠକ ଚାଲିଥିବା ବେଳେ ବ୍ଲକ ଅଧ୍ୟକ୍ଷା ସାମ୍ବାଦିକ ମାନଙ୍କୁ ବୈଠକରୁ ତଡ଼ିଦେବା ଘଟଣାରେ ଆଜି ବାଲିଅନ୍ତା ବ୍ଲକ କାର୍ଯ୍ୟାଳୟ ସମ୍ମୁଖରେ ସାମ୍ବାଦିକ ମାନଙ୍କର ଧାରଣା ତୃତୀୟ ଦିବସରେ ପହଞ୍ଚିଛି। ବାଲିପାଟଣା, ବାଲିଅନ୍ତା, ଧଉଳି, ନିଆଳି, ଭୁବନେଶ୍ୱର ପ୍ରଭୃତି ଅଞ୍ଚଳରୁ ଶତାଧିକ ସାମ୍ବାଦିକ ଆଜିର କାର୍ଯ୍ୟକ୍ରମ ରେ ଯୋଗ ଦେଇ ଅଧ୍ୟକ୍ଷା ଙ୍କ ଅହଙ୍କାରୀ ମନୋବୃତ୍ତିର ଦୃଢ଼ ନିନ୍ଦା କରିଥିଲେ। ଧାରଣା ସ୍ଥଳରେ ଅଞ୍ଚଳର ବୁଦ୍ଧିଜୀବୀ ଡ଼ ରଜନୀ ରଞ୍ଜନ ଦାଶ ,ପ୍ରକୃତି ବନ୍ଧୁ ଦୀନବନ୍ଧୁ ଭୋଇ, ଉମାଦେଇବ୍ରହ୍ମପୁର ସରପଞ୍ଚ ରମଲତା ନାୟକ, ସମିତି ସଭ୍ୟ ରଞ୍ଜନ କୁମାର ମହାପାତ୍ର ପହଞ୍ଚି ଘଟଣାର ଦୃଢ଼ନିନ୍ଦା କରିବା ସହିତ ଆନ୍ଦୋଳନକୁ ସମର୍ଥନ କରିଥିଲେ। ବାଲିପାଟଣା ପ୍ରେସ କ୍ଲବ୍ ସଭାପତି ଦିଲ୍ଲୀପ କୁମାର ଓଝାଙ୍କ ନେତୃତ୍ଵରେ ବାଲିଅନ୍ତା, ଧଉଳି, ନିଆଳୀ ଆଦି ଅଞ୍ଚଳର ଗଣମାଧ୍ୟମ ପ୍ରତିନିଧି ଅନିର୍ଦ୍ଧିଷ୍ଟ ସମୟ ପାଇଁ ନ୍ୟାୟ ମିଳିବା ପର୍ଯ୍ୟନ୍ତ ଧାରଣା ଅବ୍ୟାହତ ରହିବା ସହ ଆଗାମୀ ଦିନରେ ଆହୁରି ଅଧିକ ସଂଖ୍ୟାରେ ସାମ୍ବାଦିକ ଏଥିରେ ସାମିଲ ହେବେ ବୋଲି ସୂଚନା ଦେଇଥିଲେ।
