ବାଲିଅନ୍ତା ବ୍ଲକ୍ ରେ ଫଳକ ରାଜନୀତି, ଗୋଟିଏ ଦିନରେ ଦୁଇଥର ଉଦ୍ଘାଟନ
ପ୍ରଥମେ ବିଜେଡ଼ି ପରେ ବିଜେପି
ଏପଟେ ଚିକିତ୍ସା ନ ପାଇ ଫେରୁଛନ୍ତି ରୋଗୀ
ବାଲିଅନ୍ତା,୨୨।୩(ଶାନ୍ତିସ୍ତୁପ) ଜୟଦେବ ନିର୍ବାଚନମଣ୍ଡଳୀରେ ଶାସକଦଳ ଓ ବିରୋଧି ଦଳ ମଧ୍ୟରେ ଫଳକ ପ୍ରତିଯୋଗିତା ଆରମ୍ଭ ହୋଇଯାଇଛି। ବାଲିଅନ୍ତା ବ୍ଳକ ଅଞ୍ଚଳରେ ସ୍ୱାସ୍ଥ୍ୟକେନ୍ଦ୍ର ଉଦଘାଟନ ବିରୋଧି ଦଳ କରିଥିବା ବେଳେ ଅପରାହ୍ନରେ ଭୁବନେଶ୍ଵର ସାଂସଦ ଓ କର୍ମୀମାନେ ନେଇ ଉଦଘାଟନ କରିଥିଲେ। ଅଞ୍ଚଳରେ ରାଜନୈତିକ ବିବାଦ ବୃଦ୍ଧି ଯୋଗୁଁ ରୋଗୀମାନେ ଚିକିତ୍ସାଳୟରେ ସେବା ପାଇବାରୁ ବଞ୍ଚିତ ହୋଇଥିବା ଅଭିଯୋଗ ହୋଇଛି। ଗୁରୁବାର ବାଲିଅନ୍ତା-ବେଣୁପୁର ପ୍ରାଥମିକ ଗୋଷ୍ଠୀ ସ୍ଵାସ୍ଥ୍ୟକେନ୍ଦ୍ରର ନୂତନ ଗୃହ ଅଧାପାନ୍ତରିଆ ଅବସ୍ଥାରେ ଉଦଘାଟନ ହୋଇଛି। ନୂତନ ଗୃହରେ ଏ ପର୍ଯ୍ୟନ୍ତ ବିଦ୍ୟୁତ ସଂଯୋଗ, ପାନୀୟ ଜଳର ବ୍ୟବସ୍ଥା ଓ ରୋଗୀମାନଙ୍କ ଲାଗି ଠିକ ଭାବେ ଭିତ୍ତିଭୂମି ହୋଇନାହିଁ। ଉଦଘାଟନ ପରେ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ସରକାର ରୋଗୀ ସେବାକୁ ଗୁରୁତ୍ଵ ଦେଉଥିବା ବେଳେ ଖୋଦ ରାଜଧାନୀ ଉପକଣ୍ଠରେ ଉଦଘାଟନ ଆଳରେ ନେତା ଓ କର୍ମୀଙ୍କ ମାନଙ୍କ ସହିତ ଚିକିତ୍ସକ ଓ ସ୍ୱାସ୍ଥ୍ୟକର୍ମୀ ମାନେ ବ୍ୟସ୍ତ ରହିଥିଲେ । ଯାହାଫଳରେ ରୋଗୀମାନେ ମୁହଁ ଫେରାଇ ରାଜଧାନୀ ଚିକିତ୍ସାଳୟ ଓ ଘରୋଇ ଚିକିତ୍ସାଳୟ ଉପରେ ନିର୍ଭର କରିଯାଇଥିଲେ ।
